Europa ne plu es exemplari in su libertá de presse, secun Raporteros Sin Frontieras

De un articul trovat ci in francesi.

Libertá del presse in li Old Continent es ínsatisfatori, particularimen in Francia, Italia e Slovakia, durante que li Unit States con li "Obama-efecte" ha restaurat su image, secun li classification mundal de 2009 de Reporters sans frontières (Raporteros Sin Frontieras, RSF) publicat mardí.

Por li triesim annu consecutiv, li "trio infernal" de Turkmenistan, Corea de Nord e Eritria, relativmen in 173im, 174im e 175im positiones, remane al fine del liste.

In ti tri landes, li presse es "talmen silenciat que it es ínexistent", explica RSF.

In li trio al cap on trova Denmark, Finland e Irland, landes u li libertá del presse es max respectat.

Támen, RSF note que Europa, "longmen exemplari in su respecte del libertá del presse", ha regresset, con "solmen 15 del landes de Europa es in li gradu superiori (li max alt 20) contra 18 in 2008".

"It es disturbant que on trova que li democraties de Europa quam Francia, Italia o Slovakia continua, annu pos annu, a perdir lor positiones in li classification", comentat Jean-François Julliard, secretario general del organisation.

"Qualmen on denuncia li violationes fat in li munde si noi ne es ínreprochabil in nor territoria", il dit.

Francia, quel ja ha perdit quar locs in 2008, ha perdit ott altris in 2009 por aparir in li 43im position.

Italia, u jurnalistes es ancor fisicmen menaciat secun RSF, cadet al 49im loc e Slovakia, 7im in 2008, cadet al 44im loc.

Ci tri landes ha cedet lor position al yun democraties de Africa (Mali, Africa de Sud, Ghana) e Latin-America (Uruguay, Trinidad e Tobago).

Por RSF, "li menacie principal" veni del nov legislationes in vigore, quam li jure de response automatic introductet in Slovakia.

Támen, li Unit States ha fat un grand salta, del 40im al 20im loc. "Li ariva del nov presidente Barack Obama e su atitude min guerraci quam de su precessor al presse ha fat mult", emfasa li organisation.

RSF monstra con li altri fingre al Israel, quel ne plu es li unesim land in li Media-Ost pos un perde de 47 locs (nu 93im), e Iran, quel ha aproximat se "al porta del trio infernal".